កំពង់ស្ពឺ÷ ឯកឧត្តម ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម បានអញ្ជើញជាអធិបតីភាពក្នុងពិធីសម្ពោធដាក់ឲ្យប្រើប្រាស់ជាផ្លូវការ នូវអគាររដ្ឋបាលថ្មី នៃមន្ទីរពាណិជ្ជកម្ម ខេត្តកំពង់ស្ពឺ និងមានការអញ្ជើញចូលរួមពីសំណាក់ ឯកឧត្តម យឹម សុខុម ប្រធានក្រុមប្រឹក្សាខេត្ត ឯកឧត្តម វ៉ី សំណាង អភិបាលខេត្ត និងឯកឧត្តម លោកជំទាវ ប្រតិភូអមដំណើរ កងកំលាំងទាំងបី លោកស្រីតំណាងមន្ទីរពាណិជ្ជកម្ម បណ្ដាលរាជធានីខេត្ត តំណាងមន្ទីរ អង្គភាពជុំវិញខេត្ត សមាជិកសភាពាណិជ្ជកម្មសរុបប្រមាណជា ១១៥ នាក់ នៅមន្ទីរពាណិជ្ជកម្មថ្ងៃទី ២៧ ខែកក្កដា ឆ្នាំ ២០២០។
![](https://asset.cambodia.gov.kh/provincial/sites/24/2020/07/IMG_20200729_130255_210-1024x767.jpg)
![](https://asset.cambodia.gov.kh/provincial/sites/24/2020/07/IMG_20200729_130246_585-1024x481.jpg)
ស្ករត្នោត ជាអត្តសញ្ញាណសំគាល់ខេត្តកំពង់ស្ពឺ ដូច្នេះមន្ត្រី នៃមន្ទីរពាណិជ្ជកម្ម ត្រូវខិតខំចុះអប់រំណែនាំឲ្យសហគមន៍ស្ករត្នោតទាំងអស់នៅក្នុងខេត្តកំពង់ស្ពឺ ត្រូវខិតខំផលិតស្ករ ទៅតាមតម្រូវទីផ្សារប្រកបដោយគុណភាព ព្រមទាំងដំណាំកសិផលជាច្រើនទៀត ដែលជាសកដានុពលសម្រាប់ខេត្តកំពង់ស្ពឺ។ ដូច្នេះហើយទើបទាមទារ ឲ្យមន្ត្រីទាំងអស់ ត្រូវមានសមត្ថភាពខ្ពស់ មានទាំងចំណេះ ជំនាញ និងភាសាបរទេសបន្ថែមទៀត។ ឯកឧត្តម ប៉ាន សូរស័ក្តិ មានប្រសាសន៍បែបនេះ គ្រាដែលឯកឧត្តមអញ្ជើញជាអធិបតីភាពកាត់ខ្សែបូណ៌សម្ពោធដាក់ឲ្យដំណើរការ ជាផ្លូវការនូវអគាររដ្ឋបាលថ្មី របស់មន្ទីរពាណិជ្ជកម្មខេត្តកំពង់ស្ពឺ។
![](https://asset.cambodia.gov.kh/provincial/sites/24/2020/07/IMG_20200729_130322_594-1024x767.jpg)
ឯកឧត្តមបានបន្តទៀតថា÷ មន្ត្រី នៃមន្ទីរពាណិជ្ជកម្មទាំងអស់ មិនត្រូវទាមទារសេវាបន្ថែម ឬកម្រៃជើងសារក្រៅអំពីការកំណត់ ដោយក្រសួងសាមីទៅលើក្រុមហ៊ុនសហគ្រាស ឬម្ចាស់អាជីវកម្មនៅក្នុងខេត្ត។ ហើយត្រូវមានការទំនាក់ទំនងល្អជាមួយអាជ្ញាធរភូមិ ឃុំ ស្រុក ខេត្ត និងមន្ទីរ អង្គភាពជុំវិញខេត្តទាំងអស់ ដើម្បីសម្រេចកិច្ចការតាមគោលការណ៍របស់ក្រសួង ដែលបានប្រគល់ឲ្យ។ ហើយត្រូវអប់រំណែនាំបន្ថែមទៅដល់សមាគម ដែលមន្ទីរបានចងក្រង ឲ្យពួកគាត់បានយល់ដឹងកាន់តែច្បាស់អំពីហានិភ័យ ចំពោះជំងឺរលាកផ្លូវដង្ហើមថ្មីកូវីដ-១៩ ផងដែរ៕
![](https://asset.cambodia.gov.kh/provincial/sites/24/2020/07/IMG_20200729_130308_513-1024x767.jpg)
![](https://asset.cambodia.gov.kh/provincial/sites/24/2020/07/IMG_20200729_130302_968-1024x767.jpg)
![](https://asset.cambodia.gov.kh/provincial/sites/24/2020/07/IMG_20200729_130243_674-1024x482.jpg)